Plantun de Prouvènço

Pèr coumpara dos planto d'encò nostre

Rorippa islandica & Typha domingensis

Rorippa islandica

Brassicaceae Cruciferae

Nom en français : Cresson d'Islande.

Descripcioun :
Lou creissoun-d'islando es uno planto naneto que souvènt rebalo au sòu e que trachis en ribo de lau, mueio e riéusset d'auto mountagno. Aquesto planto raro douno d'èr au creissoun-de-palun que se retrovo mai bas en plano. Se n'en destrìo pamens qu'a la baso de si fueio e li valvo dóu fru mai primo. De tout biais vènon pas i mémis estànci .

Usanço :
Poudèn pensa que, coume lis àutris espèci dóu gènre Rorippa, lou creissoun-d'Islando es uno planto manjadisso. Escriéure au site se n'en sabès mai.

Port : Erbo
Taio : 5 à 30 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Rorippa
Famiho : Brassicaceae
Famiho classico : Cruciferae

Ordre : Brassicales

Coulour de la flour : Jauno
Petalo : 4
Ø (o loungour) flour : 2 à 3 mm
Flourido : Estiéu

Sòu : Ca
Autour basso e auto : 1600 à 2300 m
Aparado : Noun
Juliet à avoust

Liò : Lau - Estang - Mueio - Riéusset
Estànci : Subaupen à Aupen
Couroulougi : Artico-Aupenco
Ref. sc. : Rorippa islandica (Oeder ex Gunnerus) Borbás, 1900

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.